شنّ طارق كرم، شقيق الممثّل والمقدّم عادل كرم، هجوماً عبر "تويتر" ضدّ من تداول أخبار طلاف الفنان وائل كفوري وزوجته انجيلا بشارة فقال: "ما صار وقت يطلع قانون يجرّم التعرض لحياة الناس الخاصة، والقدح والذم بالإعلام والكتابة والكذب عن أخبار رجال ومرتو السابقة ويللي بعد كم سنة ممكن ولادن يقروا قرف كتاباتكن بكبسة زر!!! ما صار الوقت ينحمى نجوم لبنان من مهاترات وحيونة بعض اللّاهثين عا خبر أو ظهور أو شهرة". وأرفق التغريدة بوشم #وائل_كفوري.
وتابع: "ما صار الوقت ينحط حد لكل جبان مخبّى ورا تلفونو وبيشتم الناس وبهدّد طالع نازل وطالعلكم كم فركوح مفكرين حالن صار فيهن يحاكموا الناس بتغريدة أو فيديو؟؟؟ ما صار وقت تفكروا وتفتشوا عالحقيقة قبل ما تتفاعلوا عالعميانة سلبًا ومتل الغنم مع تغريدة أو كذبة لحدا معقّد؟؟؟". وأرفق التغريدة بوشم: #واقع_التويتر.
وأضاف: "ما صار وقت كل واحد يعرف حجمو وقيمتو بأي مجال عم يشتغل فيه؟؟؟ التلفزيون، السينما، المسرح، الإعلام، السياسة، الغناء...
بتحبو تعرفوا كل حدا قدي سعرو بالسوق وقدي ببيع وقدي بيعزم وقدي بيكذّب عا حالو قبل الناس. بتحبو تعرفوا هيدا الشي يللي بين إيديكن قدي نفخ عالم هني بالواقع بوالين مي...".
وسأل كرم: "ما صار وقت يخترعوا Platform جديد للناس يللي بتشبه بعضها بالأخلاق وإحترام الآخر؟ ما صار وقت يخترعوا جهاز كشف كذب ضمن التلفونات أو العقول قبل ما نبخّ سموم وكذب وقلة وفا لما نحكي ونحنا صارت خالصة مدّتنا! ما صار وقت تعرفوا إنو 95٪ من الرأي العام ما بيشوف يللي بينكتب هون وخاصة بلبنان.
ما صار وقت تحسوا إنو لبنان الإنفتاح والحريات والفنون عم بزول شوي شوي بسبب بعض العقول المريضة ومش نظام الرقابة وصرت شو ما بدك تعمل بيطلعلك فيه عنصرية وتحقير أديان ومناطق وشخصيات وطائفية وتعنيف وحقوق مهدورة وهيدا بيطّبق بس عا ناس وناس وأشباه ناس تانية بتكفر وبتهين وما في مشكلة...".
وعن الجدل الحاصل حول فرقة "مشروع ليلى"، قال: "ما عم بفهم ليه هالقد قايمين القيامة عا كلمات أغاني مشروع ليلى وبالأساس الشباب ما حدا بيفهم عليهن بس يغنّوا...".
ليردّ الاعلامي جو معلوف قائلاً: "بتضل أغانين أوضح من الموازنة ومستقبل البلد إقتصادياً".