انتشر على وسائل التواصل الاجتماعي "هاشتاغ" بمناسبة حرب تموز تداوله أنصار "حزب الله" "#بتذكر_بحرب_تموز"، فكتبو الكثير من الذكريات بعضها طريف، فيما كان الجزء الآخر جدّي.
وكتبت ملاك منتش: "#بتذكر_بحرب_تموز لما كنا هربانين على الشياح يا صادق بن محمد شعيتو وانت كنت علقان بمستشفى تبنين، كنا عاملين غدا عند خالتك ناديا واذا ب ام حسن شعيتو تبلش بكا. سألناها شو في؟؟ قالت يقبرني صادق بحب الفخاد بالصنية، فبكت ام حسن وبكى الجميع وبقيت الصنية متل ما هيي".
فيما صفحة بلدة مركبا علّقت: "#بتذكر_بحرب_تموز لما كتب طلال سلمان بافتتاحية السفير: "ايها العرب... نحن بخير طمنونا عنكم".
اما ابو علي فرحات فقال: "بتذكر واحد قلي انو كمش 3 حرماية بحرب تموز، وهو مواليد 2000".
بدورها ضحى كروب غرّدت: "#بتذكر_بحرب_تموز انو تعلمت الشطرنج، الدامة، الطاولة، البرجيس، أونو".
كذلك سحر الحسيني التي اكدت: "#بتذكر_بحرب_تموز الكلمة الماسية في الوقت الماسي اما الدموع فهي لا تنفع أحدو".
وعلّق ابراهيم الحريري: "#بتذكر_بحرب_تموز لما عمل الشهيد القائد علي صالح (بلال عدشيت) مجزرة دبابات بوادي الحجير وراح فيها 35 دبابة واكتر".
وتذكرت ضحا موسى: "بتذكر_بحرب_تموز.. لما كان الاسرائيلي يطالعنا من بيوتنا ويحط الدبابات بحارتنا بحكم قربها من الحدود ويستغل انو حزب الله ما رح يرد عالضيعه لانها منطقه فيها سكان".
اما فاطمة حرقوس فاعترفت بسرقة التفاح من شجرة جارها قائلةً: "#بتذكر_بحرب_تموز جارنا بو فيصل الله يرحمو كان زارع شجرة تفاح كان عم يربيها كل شبر بندر [سرقتلو ياها] الله يرحمك يابو فيصل سامحني".
بدوره جاد عيسى غرّد: "#بتذكر_بحرب_تموز لما انرفعت صورة السيد بجامع الأزهر".
أما الحاج باقر فكتب عبر صفحته على موقع "تويتر": "#بتذكر_بحرب_تموز انو من نعم الله علينا عدم رواج وسائل التواصل الاجتماعي في حينه! بتتخايلوا حرب تموز عالواتساب".
(خاص"لبنان 24")