أكّدت رئيسة "الكتلة الشعبية" ميريام سكاف أنّ "الهدف كان عدم الذهاب إلى معركة كسر عظم، ولكن عظمنا ليس من النوع الذي ينكسر". وقالت في مؤتمر صحافي عقدته حول الإنتخابات البلدية: "فهموا خطأ سعينا للتوافق... فلنذهب اذا الى معركة". وجاء في كلمتها ما يلي: يا أهلي، أهل زحلة الكرام، لأوّل مرّة بنلتقي ع عنوان إنتخابي من بعد رحيل الياس سكاف. ولأوّل مرة هوي مش معنا .. بس رح نحكي إنتخابات على ذات لغتو. هاللغة الي كان يقولها بكل شفافية وصدق وإحترام لكل مكونات المدينة. كرمال هيك رح تكبر مسؤولياتنا لنكون ع مستوى أمَلَك فينا. وعدنا إلك يا آدمي انو أمانتك نوضعت على سكة التطبيق. وعدنا إلك انو نصون مدينتنا متل ما كنت صاينها بكل ما أوتيت من محبة. رح تشتقتلك الوراق.. اقلام الاقتراع .. الصناديق ..وجودك رح تفقدوا الماكينة الشعبية الي ناسها بيشتغلوا عن سابق ضمير حي .. وإيمان بقضية . زحلة.. سمّوها عروس.. سمّوها الوعد.. سموّها بوابة البقاع.. المنارة.. عاصمة الكاثوليك وعصامية القرار. زحلة اليوم عم تجمع كل هالاوصاف بإستحقاق واحد.. لتهديهن لروحك يا إيلي وتقلك إنو ناسك اوفيا.. كبار.. وقد التحدي. وع رغبتك.. رحنا ع خيار التشاور.. زرناهن ببيوتن ومقراتن الي خارج زحلة.. ومدّينا الإيدين ع قاعدة التوافق مع الحفاظ على خصوصية المدينة. جِلنا.. وطرحنا رؤيتنا لمجلس بلدي ما بيلغي حدا.. مجلس يكون هدفو إنمائي قبل ما نسأل عن الحصص وتوزيع المقاعد كمغانم. كان هدفنا ما نروح ع كسر عضم.. بس هيدا ما بيعني إنو عضامنا من النوع الي بيتكسر. فِهمونا غلط.. وإعتقدوا انو طرحنا للتوافق هوي ضعف.. أو إستجداء للتحالف. لأ.. وبنقلوها مش لأنو بنعرف نقول ونطبّق.. إنما لان زحلة وعائلات زحلة الكريمة ( وكل زحلة عائلاتها كريمة) بتستاهل انو ما تنباع بسوق الاحزاب الي ما رح تعمل الا بقرار قياداتها ومش بالقرار الزحلي الحر. وحقكن علينا يا أهلنا تعرفوا تفاصيل مرحلة التشاور وأي طريق سلكنا توصلنا لهون. واليوم رح نقول: لهون وبس.. وخلينا نروح ع معركة. نحنا بالكتلة الشعبية ومن قبل أعلان مواعيد الانتخابات البلدية سعينا لطرح التوافق، وعملنا إعتبار كتير كبير للتحالف المسيحي المسيحي على مستوى لبنان المتمثل بجمع القطبين العوني والقواتي. رحبنا بالخطوة المهمة الجامعة للصف المسيحي من حرصنا على صيانة هالوحدة وتمنياتنا انو تتعمم وتصير نموذج لكل طرفين اختلفوا، لانو وطنّا ما بيحمل انقسام وشرذمة بوقت رئاستو فارغة.. ومؤسساتو شبه معطلة. لكن أمام سياسة الباب المفتوح بشو استقبلونا؟ بإعطائنا خمس اعضاء بلدية بس ومن دون الرئيس أو برئيس ( ملك) بينما كان طرحنا الحصول على عشر اعضاء ..ورحنا معن لطرح اكتر ليونة لمن اقترحنا رئيس بلدية محايد.. لكن رفضوا.. وحجّمونا بخمسة من أصل واحد وعشرين مقعد.. هلقد بنظركن بنستاهل ؟ نحنا انطلقنا من هدف تحصين قرار البلدية اذا صارت اي مستجدات سياسية اطاحت بالتحالف، وهني انطلقوا من حرب إلغاء ضدنا.. ضد كتلة شعبية عمرها 80 سنة من حب الناس.. ضد عائلات عريقة ضاربة عروقها بارض هالمدينة. اليوم.. الي اتفقوا رح يغلّبوا مصالحن السياسية ع مصلحة مدينتكن يا اهل زحلة، لانو القرار ما رح يكون نابع من قلب هالمدينة.. رح يكون من شي مقر.. من عرين سياسي.. مَنّو عايش وجعكن ولا رح يشعر إنكن ناس تمرّسوا ع صنع القرار . بيكفّي تهميش.. ممثلينكن كانوا عم بيقضّوا وقت حلو بالسلطة .. تسلّوا منيح ، بس شو المشاريع الي قدموها لزحلة؟ وين تمثلت المدينة بالاستحقاقات المهمة؟ بشو فاجأونا؟ هني أنفسن وبأعتراف أحدن .. أكدوا أنو ما قدرنا عملنا شي ليش؟ إنتو قولوا ليش؟ لأنو قرارن مش بإيدن .. لأن التخطيط مش عم ينبع من قلب مدينتن .. غيرن بيخطط.. وبينفذ . ومساقبة أن زحلة مش ع خريطة إنمائهن وسياستن الا بساعة الانتخابات. نحنا ولا مرة أعتبرنا أنو زحلة " لحظة".. هيي الوقت كل الوقت ..وكانت عيننا ع زحلة .. مش نحطها "بقلب" قاسي وننسى وجودها .راقبنا ... دققننا وحاسبنا.. وصرخنا بوج الايدين الممتدة عالمدينة وجربت تلوث بيئتها .. وما عنا حرج أنو نحاسب كل طرف بيحاول يسيئ ويستغل منصب .. حتى ولو كنا عم نحكي عن شخصيات وثقنا فيها وأنقلبت عالثقة .اولاد الاحزاب هودي ولادنا.. بس ما رح نسمح للاحزاب تلغينا.. وتسكر بيوت عاشت مفتوحة لخدمة الناس. بكرا بواب المقرات الكبيرة والمحصّنة ما رح تلتفت إلنا.. رح تهتم بأولوياتها السياسية وحصصها ومغانمها، وتتجاهل انو في مدينة اسمها زحلة متروكة ع هامش القرار. يا اهلنا، ما رح نرتضي بدور تابع.. نحنا صوت مش صدى.. الي عندو شعب متلكن قاوم جيوش وحمى أرضو ع مدى 300 سنة.. ما رح يلغوه بانتخابات بلدية. قلنالن أنو زحلة " حيطا مش واطي " بس يبدو انو ما أقتنعوا معنا وبدن يجربونا. حقن يجربوا بعملية ديمقراطية نزيهة .. والانتخابات أسمى أنواع الديمقراطيات .. بس مش حقن المراوغة وإدعاء الحرص عالتوافق. بالوقت يلي كانوا عم بيناورا لتقطيع الوقت وإبلاغنا باللحظات الاخيرة أنو " هالقد حصتكن". نحنا مش حصة .. وجودنا مش للتفاوض ع المصير .. وبدل ما تفاوضوا ع الغاء ولاد مدينتكن كان من أولوياتكن (بما أنكن ممثلين بالسلطة) تتفضلوا تطالبوا بمقعدين لتعنايل يلي أضافوها إنتخابياً على المدينة .. وتعنايل وأهلها بيستحقوا تمثيلن ببلدية صاروا جزء منها . ولانو قررنا نكون صوتكن.. متل ما كنا ع مر التاريخ.. ف رح نخوض هالمعركة وحدنا ككتلة شعبية. رح نخوضها بوجه تلات أحزاب تحالفت ضدنا..وقررت الغاء بيت ايلي جوزف طعمة سكاف الي رحل عن هالدني هوي وعم بيوصينا بزحلة وأبناء زحلة ووحدة زحلة . تلات أحزاب..؟ ويكونوا أكتر .. المهم بشو رح يوعدوكن .. وشو المشاريع الي رح تتنفذ. وعدنا الكن مجلس بلدي ع قد طموحكن .. ورغبتن بالمشاركة بالقرار .. ما رح تكونوا الخاصرة الضعيفة ..ولا نقطة ببحر حدا ..خمس مقاعد ما كانت رح تعمل المعجزات .. ف لمن بيكون المجلس البلدي مقسم خمسات بيتقسم القرار. من هون بدهن زحلة مقسمة .. على حجم الاحزاب، وهالقسمة ما بدهن ياها لصالح زحلة انما لخدمة احزابن .. فالحصص بتساعدن ت يفاوضوا ع المغانم برات المدينة ويستثمروا فينا ليبيعونا بسوق مزايدات " خود وأعطيني " ع موائد القيادات السياسية .واليوم .. بنربح .؟ . رح نربح بقدرتنا مش بقوة الاحزاب .. وبنخسر ؟ .. ما الخمسة بتشبه الخسارة بس ع تنازل عن الكرامة ..ونحنا عنا كرامة أهل زحلة بتتقدم ع أي تحالف بالإكراه.. وهالكلام انا اكيدة لو ايلي سكاف كان بيناتنا كان قال متله وأكتر ... وحدنا... شو هَمّ... الارزة ما بتتكي ع حدا لتوقف".