كتبت رئيسة الكتلة الشعبية ميريام سكاف في تصريح لها عبر مواقع التواصل الاجتماعي، قائلة: "مثل كل ام وبي.. وعند كل اول عام دراسي بيوجعنا قلبنا ع سنة صعبة، وبيزيد الوجع مع زيادة الاقساط عالناس وولاد الناس. ما بيكفي نسأل شو قادرين نعمل. يلي قادرين عليه كتير واول خطوة هيي دعم المدرسة الرسمية يلي بتخرجّ سنويا طلاب من الاوائل ع مستوى لبنان".
واضافت: "هالتلاميذ المتفوقين .. ما بيحقلّن بمدرسة متطورة؟ بمباني تعليمية حديثة؟ بصفوف ما بيفوت عليها الشتي وبتهّد طلابها شمس الصيف؟ بمختبرات .. مكتبات .. بملاعب .. بمكان بيعطي الوحي للتلميذ مش بيزيد ع قلبو الهم؟ باستاذة ما بيضلهن بالشارع يصرخوا ويطالبوا بحقوقن المشروعة؟ بدل ما نفكر انو نعطي 800 مليون دولار لننضف مجرى نهر الليطاني ليش ما بنحّول هالمبلغ لدعم المدرسة الرسمية وتلامذة الرسمي واستاذة الرسمي؟ كتار مزاريب الهدر .. وقليلة ميزانية وزارة التربية ..".
وتابعت: "وبدل ما ننضّف مجرى النهر بمبلغ خيالي خلينا ننضّف العقلية السياسية يلي بعدها شايفة بالمدرسة الرسمية شي ثانوي ما بيستحق الدعم، إذا فكرنا فيها بنلاقي انو مسوؤلية التعليم الرسمي بتوقع ع الدولة بس مسؤولية تنضيف النهر بتوقع ع يلي وسخوه ..خلّي هالشركات والمعامل تنضّف بمحل ما لوثّت .. وخلّي دولتنا تجيّر هالمبلغ لمحل بيخرّج عقول واجيال".