ألقت أرملة الوزير والنائب السابق الياس سكاف ميريام طوق سكاف كلمة بعد الصلاة على جثمان الراحل في كنيسة "سيدة النجاة" في مدينة زحلة، رثت فيها زوجها معلنةً أن منزله سيبقى مفتوحاً أمام المحبين. وجاء في الكلمة: "رئيس الكتلة الشعبية الراحل الياس سكاف، متل الكأنو عيد.. شوي رح بتطل رافع كاس نبيد، ولأول مرة بشوف عيد مبلش من البحر للجبل.. رافع ع كتافو موكب أسود من بيروت لزحلة.. ملون ع كل هالدرب.. بناس وورد وكتير من الحب.. وفي إيدين عم بتلّوح.. ووراق شجر عم تنزل لتسلم عليك وتقلك ما تغيب. تعا.. فتحهن عليي عيونك يا ايلي.. تعا.. مش دموع هودي الي بعيونك.. هيدي فتافيت حلم انكسر. مش حزن هيدا الي بقلبنا.. هيدي حرقة عمر انقهر. قوم يا مزين هالدني.. خليك شال.. ما تصير خيال.. قوم طفي شموعك.. خود من عمري عمر بس ما تبعد عن هالبال. شو حلو حب الناس إلك.. انت الي انزرعت فيهن.. كنت حلمن. وقفت عند اوجاعن.. وكل ما شفيوا كنت تكبر.. صرت القصة ال رح تتخبر. إيلي.. يا وعد الناس الي تأملوا فيك.. يا حارس نعسن.. الي متلك ما بيفل.. كتير بيضل. بيصير يطلع مع كل شمس.. بنشوفوا برف طيور.. ع سطوح قرميد.. بتلوحلوا كل إيد.. إيلي يا عمر الحلا.. يا خوابي رح تنتلا.. كيف معقول ودعك وأنت بعدك معي.. عطرك بهالبيت.. لاء انت ما فليت.. وجّك مرايتي.. يا رجوتي يا صخرتي يا سندي المتوّج بأسرارنا.. الي رح نحكيها لزغارنا... وجّك هون.. صوتك مملّي الكون.. محفور ع رخام.. ما بتمحيه الايام. مطارحنا سوا.. رح تضل مضوايي متل هالمدينة الي ما عرفت العتم.. هودي ناسك جايين.. حاملين الوفا عالجبين. ما تخلينا نندهلك كتير.. تعا مع أول الشتي لتزهر مواسم الدني.. كلنا ناطرينك تطلع من وعد.. من ورد.. من أغاني.. من أسامي من بيوت عمراني.. لمن وعيت من غفوة طويلة كنت حابب تشكر الناس الي وقفوا ع بابك بالمستشفى.. نطروك لتوعى.. غمروك بالحب.. وصاروا يصلّوا.. ويمكن صلاتن بكّت الدني.. هودي الناس صاروا أكتر.. يلا نشكرن.. نقلن إنتو دهب من لحم ودم.. إنتو ملح الارض.. ومرايا المي.. والعمر العتيق.. كنتوا معنا شعب الصفا.. وصرتوا كل الوفا.. بمحطات عديدة وقفنا سوا بوج الريح.. تقاسمنا النصر والإنكسار.. وبيلبقلكن اليوم إني إنقلكن سلام إيلي سكاف الي بعتوا من عز الوجع.. وبلغكن انو هوي كان ممنون لكل تضحية ووقفة ومحطة. وصّانا بالحب حتى بوجّ البغض.. وتركلنا زاد بيكفي بلاد.. زاد من الكرامة ووقفات العز والروح الانسانية الي كانت موزعة ع الكل.. وتحت هالمبادئ بنعلن انو بيت ايلي جوزف طعمة سكاف.. الّي عمر فيكن.. رح يكبر ويعلا فيكن ورح يضل مفتوح للناس.. كل الناس.. وجعكن وجعنا.. وفرحكن فرحنا.. وبلوغكن الاهداف هوي هدفنا.. ويمكن قلال منكن بيعرف انو أيلي سكاف إختبر طفولة أكتر من صعبة.. كان فيها الشقى رفيق أول الصبا/ وِعي عالدني لقي حالو ببلد بعيد.. بحقول ما بيعرفا.. واضطر انو يفلح الارض تتضل حاملتو هالارض.. إبن 16 سنة تعرف إيلي على بيّو لأول مرة.. واليوم عم يترك ولادو هني وبعمر ال16.. وكأنوا القدر عم يرسم عمار عالقد.. وعم بيحدد عدد سنين الرعاية الأبوية. يا جوزف ويا جبران.. يا ولاد إيلي سكاف.. يا ولادي ورجال بكرا.. يلي دموعكن عم بتخبوها لليل وتزرعوها عالمخدة.. انتو هالحلم الي بيكن عاش على أملو.. كونوا الحقيقة الي ما بتغيب.. إيلي الي كان رفيقكن وبيكن بنفس الوقت.. تركلكن قيم عالية وإرث من محبة الناس الي تجمعت لتصير "كتلة شعبية".. بيكن يا ولادي ما بيشبه حدا.. وكان ما يفرّق بين حدا.. مسيرتو السياسية ما إقتصرت عالنجاح لوحدو.. إنما محطات الفشل تعلّم منها كتير.. وأول درس حفظو انو بالسياسة ممكن كمان تمرق عليك أمراض خبيثة وما الها علاج.. وإيلي سكاف من الشخصيات الي وقفت بوجّ الريح حتى لو ما كانت عم تشتهي السفن.. ولما قرر إيلي يفل أخذ معو وجعو وبس.. وترك الامراض السياسية لاصحابا.. ومين قال إنو ما تركت ع جسمو مرارة وحسرة.. ومين قال انو هل انسان الطيب ما كان عم يتواجه بنوايا سيئة.. وبحرب جربت وما قدرت تهز الزعامة يلي تربع فيها ع قلوب الناس.. ورح يضل بالحياة وبعد الموت.. شو وصاني؟؟ ما بيهم بقية التفاصيل.. يمكن عبارة "رضاكي" بتعبّر عن مسيرة حياة.. عن شراكة عمر أنتج كنز العمر.. عن حب إنكتب ع شجر الازر وانساب مع مياه البردوني.. اليوم.. وقدامك انت وغافي.. قدام ناسك.. وشهودي الكنايس الي رافعة جراسها لتعانق المآذن.. وعلى مرأى من رجال دين ودنيا: انا يلي بطلب رضاك.. وبوعدك اني مع جوزف وجبران رح نكون ع خطاك. ايلي حبيبي الله معك".