عقدت رئيسة "الكتلة الشعبية" ميريام سكاف مؤتمراً صحافياً في دارة الكتلة في زحلة حضره أعضاء لائحة الإنتخابات البلدية "زحلة الأمانة"، وحشد من الشخصيات والفعاليات ومناصري الكتلة الشعبية. وقد جاء في كلمة سكاف: "يعطيكن 9 آلاف وخمسمية عافية تعْمر هالايدين الي بترفع الراس ومن هالرقم .. رح نبدا ، لأنو الي صار بداية.. ومنو نهاية بداية محصَنة بعمران بشري .. بناس أحاطونا بالحب والصدق وياريت صدق القيادات كان على حجم هالوعد . يا أهلنا بزحلة.. لمن كرمتونا بأصواتكن كنتو عم تأكدوا للكل انكن صامدين بوج ريح تكتلت علينا وانكن .. قدن كلن .. هيدا مش تحليل ولا تمني .. هيدي الارقام الي عم تحكي. وبهالمقياس .. نحنا حققنا فوز كبير .. ما فتنا بمغامرة مش قدها.. لأنو ما بنغامر فيكن.. ولمن رفضنا التحجيم كنا عارفين انو دخلنا معركة .. فيها حسابات الربح والخسارة فالكتلة الشعبية بنت التسعين سنة بالشأن العام .. ما رح تفوت بتجارب للكسر .. والي صار بيأكد أنو إنتصرنا .. نحنا ما أنكسرنا .. ولا غامرنا .. الفرق أنو الاخرين أحتفلوا .. لكن بكل فخر: فينا كما نحنا ن نحتفل بالنتجية المشرفة الي منحونا ياها اهل زحلة من حقن علينا نقلن شكرا وشكرا وشكراَ .. صوتكن بيعطي أمل لبكرا .. بيأسس لمرحلة متكلة ع نفسها.. ع وجودها وما بتتعكز ع صوات غيرها.. بشكركن يا أهلي .. لأنو خضتوا معنا معركة صعبة .. ويا أهلي .. لو كنا طامحين لفوز سهل ما كان في أهون من أنو نصطف خلف فريق او نتحالف مع فريق تاني لكن عنا ثقة بخياراتنا و ما لحقنا الا مبادئنا وضميرنا .. ما رح تصدقونا إذا حاربنا الفساد كل الوقت ورجعنا تحالفنا معو بالوقت الانتخابي من هون نحنا ربحنا صدقيتنا قدامكن .. وما فتنا بزواريب بيلجأ الها كتار من أهل السلطة .. وربحنا وجودنا وقرارنا الحر .. ولو بدنا ندوب معن كنا دبنا بخمس أعضاء .. ومتل ما قلنا سابقاً الخمسة يعني خسارة .. وبنفضّل النتيجة يلي وصلنالها على النتائج الي كانوا بدهن يوصلوّنا ليها ويلي هيي إلغائنا. حققنا رقم إنتخابي كبير .. ما قدر يتمثل بالبلدية بس قدر انو يمثل خط مستقيم قررنا نمشي عليه ولو وحدنا .. مشكورين حزب الله والمستقبل لانو توزعت اصواتكن للكل وبيناتن الكتلة الشعبية .. وهون بدي كرر إنو حزب الله والمستقبل يلي خلقتو منن تحريض طائفي ليربحكن وزعوا اصواتن للكل ما كان عنا أدنى خجل بالتعاون مع حدا ما أخدنا .. ونكرنا .. الي معنا .. معنا .. بنقولها من دون مواربة .. ونحنا النا كل الفخر انو نتمثل من الجميع .. ولا تحدّنا طائفة وحدها وبتخلينا معزولين عن محيطنا زحلة قلب البقاع , وهالقلب فيه شرايين كل الطوائف بيشرفنا ينبض بالحياة مع جميع المكونات .. وهيدا الي عودنا عليه بيت إلياس جوزيف طعمة سكاف هالبيت الوطني العريق يلي ما عرف تمييز ولا إتكل عالفتن ليقوي حالو ويعمل حروب . والغريب يا اهلنا أنو الاحزاب التلاتة أخدت أصوات شركائنا بالوطن .. بس دقت الجراس النا ..بوجنا .. أعلنت النفير العام وكأنوا جيوش غريبة جايي تحتل زحلة.. كأنوا المدينة بزمن حرب .. وجايي المنقذ يخلّصها.. يخصلها من مين من الكتلة الشعبية ؟ من ناس قلبن ع زحلة؟ من فريق عايش من تسعين سنة بوجدان هالمدينة؟ بيحمل وجعها وبيقلق مع قلقها؟ ع هالحال يمكن التحالف المسيحي المسيحي توّحد ضدنا؟ ليش نحنا شو ؟ لكل الي كانوا خايفين علينا وإجو ع هالبيت يحذرونا من إنتهاء دورنا وتسكير بيتنا .. بنقلن أنو بيت إيلي سكاف ما بيتسكر .. سبق وخرجنا من السلطة بس ضلينا مع سلطة الناس . اليوم غبنا عن البلدية بس أرقامنا واعية وشايفينها وسع الدني .. نحنا لامسنا حدود نتائج الاحزاب الثلاثة ..وغيرن بهالمعنى .. نحنا نعم أبطال .. قاومنا ديمقراطياً الكل .. حشدوا ضدنا.. تعبأوا وعبأوا الناس .. دقوا الاجراس ..إتهمونا بالمال ..داهموا مكاتبنا بقوة التكسير والتعدي .. والله فكرنا داعش تسلل ع زحلة ..كان بدها هلقد؟؟؟ دق جراس ؟ على مين ؟ علينا؟ طلعوا عالاعلام يناشدوا الناخبين ويشدوا عصبن .. وشعرنا انو جايي تدّخل من الامم المتحدة وحلف الاطلسي وجامعة الدول .. شفنا آداء ذكرنا بأول أيام رحيل ايلي سكاف لمن بدأت عملية الالغاء .. وهون عم بحكي عن قوى وشخصيات وأحزاب .. ومتفرجين ومصفقين شافوا انو هيدي هيي الفرصة ليحققوا أنجاز عم يتعرقل ببقية المناطق .. بس قدروا يتفقوا عليي ؟؟ وع الكتلة الشعبية ؟ نحنا بنشكرن لانو هيك عرفنا قوتنا وتأثيرنا وأنو الكتلة الشعبية بدها كل هالقوى لتسقطها وبكل معاني هالصدق اليوم بنحب نأكد أنو الكتلة ما بتعاملكن بالمتل .. ومتل ما وعدنا انو نهني الرابح بنقدم التهنئة بكل ديمقراطية وأعتراف بالنتائج .. اليوم .. البلدية الي كانت معنا .. رح تستلموا مفاتحيها .. ومعا بنقدم مفاتيح التعاون لأي مشروع بيحتاج مساعدتنا وبنشكر أمانة الاعضاء لاسيما الي إشتغل منن بكل ضمير حي .. وبصندوق البلدية بنودعكن ميزانية بتبلغ 47 مليار ليرة ومشاريع حيوية كانت ناطرة التنفيذ ومنها : -مشروع التزفيت رح يبلش بعد يومين (كان فينا نفذوا قبل الانتخابات) مشروع الكاميرات للمدينة صار قيد التنفيذ، وغيرها كتير من المشاريع نحنا على استعداد لنحط ايدينا بإيديكن لأنو لمن دخلنا هالمعركة كان هدفنا الانماء لمدينتنا وما عنا هواية إعتلاء المناصب من دون إنتاج .. زحلة عروستنا نعم .. ورح تضل .. . نحنا يا أهلنا عملنا معركة مشرفة .. وع أرضنا .. بمنطقتنا .. عل التراب الي بيمشوا عليها ولادي وولادكن.. ما إستعرنا مناطق غيرنا لنفتعل إنتصارات .. هون ربحنا ؟ .. هون خسرنا؟ ما في خسارات أبداً لمن بنشوف مدى محبتكن ووفائكن لزحلة ولهالبيت . وبالنهاية ..بدي أشكر كل الي تعاونوا معنا بهالعركة .. الماكينات الانتخابية بكل المناطق .. بدي أشكر الاعضاء البلدية السابقين .. والمرشحين الي تعبوا معنا بهالمرحلة وقدموا كل جهد ونشاط وبقلن بعتذر منن إذا خيبتلن أمالكن وفي حدا ما بينشكر بس .. إنما بينهدى صلا..كان معنا من السما .. إيلي : متل ما ودعتني بكلمة : رضاكي بقلك هلق : رضاك .. وأنشالله تكون روحك راضية علينا كنت كل هالفترة الانتخابية عم بسأل نفسي لو كان إيلي معنا هل كان أخد ذات المواقف ؟ بعتقد أنو إيلي سكاف علمّنا الإستقامة والصدق مع الناس وع هالحساب نعم .. لمسنا رضاك". بعدها كانت كلمة لرئيس اللائحة يوسف سكاف جاء فيها: "بإسم أعضاء لائحة زحلة الأمانة وبإسمي بشكر أهلنا وأصدقائنا ومحبينا على الثقة هللي وضعوها فينا.وبحب طمّن الناس اللي عم بيتصلوا فيي وبأعضاء البلدية للسؤال عن المشاريع هللي كانو موعودين فيها . • مشروع تزفيت المدينة اللي حصلنا عليه أيام قليلة قبل موعد الإنتخابات وما بلـّشنا بتنفيذه فورا ً تما ينقال اننا عم نستعملوا لغايات إنتخابية ، رح يتنفـّذ خلال أيام معدودة بعدما تبلغت شركة نقولا السروجي للتعهدات هيدا الأمر . • وأما مشروع تأهيل وتحديث المطمر الصحي بواسطة الهبات العينية من المملكة المتحدة و الإتحاد الأوروبي ، ابتدأت الآليات بالوصول وستصل المعدات تباعا ً إلى زحلة ورح يكون عنـّا أحدث مطمر صحي للنفايات بالمواصفات العالمية ومعمل تسبيغ لإنتاج أفضل الأسمدة العضوية. • وبعد ما انتهينا من عملية الإستملاكات في بعض أحياء المدينة لإنشاء مواقف للسيارات رح يتمكن المجلس البلدي الجديد من وضع الدراسات التنفيذية إلها وانشاؤها. • وكذلك رح يتمكن من إعادة تلزيم ملفي كاميرات المراقبة في المدينة والجدران الداعمة الجاهزين للتلزيم. • وبحب أكـّد لأهلنا بزحلة ، هالمشاريع كلها وغيرها كمان رح تمشي لأنو البلديات هي إستمرارية في العمل الإنمائي، ورح تتنفذ بحسب أولويات المجلس الجديد. • وبقلـّون أنو اليوم في بصندوق البلدية 40 مليار ليرة تقريبا ً رح تمكن المجلس البلدي الجديد من تنفيذ مشاريع إنمائية عديدة للمدينة وأهلها بتمنى للمجلس البلدي الجديد رئيساً وأعضاءً التوفيق بمهمتهم خلال هالست سنين ونحنا كلنا حاضرين لأي مساعدة تُطلب منـّا. شكراً أهلنا وأصدقائنا ومحبينا بزحلة، شكراً سيدة ميريام سكاف – شكراً الكتلة الشعبية.....